ໃນວັນທີ 19 ມັງກອນ 2024, ກົມປະຕິຮູບລັດວິສາຫະກິດ ແລະ ການປະກັນໄພ (ປລປ) ກະຊວງການເງິນ ໄດ້ຈັດກອງປະຊຸມ ສະຫຼຸບການຈັດຕັ້ງປະຕິບັດວຽກງານວິຊາສະເພາະ ປະຈໍາປີ 2023 ແລະ ຜ່ານທິດທາງແຜນການ ປີ 2024 ພ້ອມທັງມອບໃບຍ້ອງຍໍ ໃຫ້ພະນັກງານ-ລັດຖະກອນ ທີ່ມີຜົນງານດີເດັ່ນ ປະຈໍາປີ 2022, ໂດຍການເປັນປະທານຂອງທ່ານ ໄພທູນ ທ່ຽງລະໄມ ວ່າການຫົວໜ້າກົມ, ມີຮອງຫົວໜ້າກົມ, ຄະນະພະແນກ ແລະ ພະນັກງານວິຊາການ ພາຍໃນກົມເຂົ້າຮ່ວມ.
ໃນກອງປະຊຸມ, ທ່ານ ສົມໄຊ ແກ້ວວັນດີ ຫົວໜ້າພະແນກແຜນການ ແລະ ການພັດທະນາ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານວິຊາສະເພາະ ປະຈໍາປີ 2023 ແລະ ຜ່ານທິດທາງແຜນການ ປີ 2024 ໂດຍໄດ້ລາຍງານກ່ຽວກັບວຽກງານແຜນການ ແລະ ພັດທະນາທີ່ພົ້ນເດັ່ນ; ວຽກງານຄຸ້ມຄອງ ແລະ ປະເມີນຜົນວິສາຫະກິດລັດລົງທຶນທີ່ພົ້ນເດັ່ນ; ວຽກງານປະຕິຮູບລັດວິສາຫະກິດທີ່ພົ້ນເດັ່ນ; ວຽກງານການຄຸ້ມຄອງການປະກັນໄພທີ່ພົ້ນເດັ່ນ ແລະ ໄດ້ຜ່ານແຜນວຽກທີ່ຈະຈັດຈັ້ງປະຕິບັດໃນ ປີ 2024 ພ້ອມບັນດາມາດຕະການ ໃນການຈັດຕັ້ງປະຕິບັດ ໃນຕໍ່ໜ້າອີກດ້ວຍ. ພ້ອມນັ້ນ, ກໍໄດ້ມອບໃບຍ້ອງຍໍ ໃຫ້ພະນັກງານ-ລັດຖະກອນ ທີ່ມີຜົນງານດີເດັ່ນ ໃນການຈັດຕັ້ງປະຕິບັດວຽກງານວິຊາສະເພາະ ປະຈໍາປີ 2022, ເຊິ່ງຜູ້ທີ່ມີຜົນ ດີຫຼາຍ ປະເພດ I ມີຈໍານວນ 12 ທ່ານ, ຍິງ 03 ທ່ານ; ຜົນງານ ດີ ປະເພດ II ຈໍານວນ 10 ທ່ານ, ຍິງ 03 ທ່ານ ແລະ ຜູ້ທີ່ມີຜົນງານ ດີ ປະເພດ III ມີຈໍານວນ 15 ທ່ານ, ຍິງ 08 ທ່ານ.
ໂອກາດນີ້, ທ່ານ ໄພທູນ ທ່ຽງລະໄມ ຍັງໄດ້ເນັ້ນໃຫ້ພະນັກງານພາຍໃນກົມ ສືບຕໍ່ເອົາໃຈໃສ່ປຸກລະດົມຄວາມສາມັກຄີ ສຸມໃສ່ການຈັດຕັ້ງປະຕິບັດວຽກງານວິຊາສະເພາະ ໃນຂອບເຂດຄວາມຮັບຜິດຊອບຂອງຕົນ; ບັນດາພະແນກ ຕ້ອງສ້າງແຜນການວິທີເຮັດວຽກໃຫ້ລະອຽດ ເພື່ອສືບຕໍ່ຄົ້ນຄວ້າ, ສ້າງບັນດານິຕິກໍາ ທີ່ກ່ຽວຂ້ອງໃຫ້ຫັດກຸມກວ່າເກົ່າ; ສ້າງລະບົບການຄຸ້ມຄອງ ແລະ ການປະເມີນຜົນແບບທັນທັນສະໄໝ ເຊິ່ງຈະເປັນບາດກ້າວໃໝ່ ໃນການສ້າງລາຍຮັບເຂົ້າງົບປະມານແຫ່ງລັດ. ເຊິ່ງສະແດງເຖິງຜົນງານດີເດັ່ນ ຂອງພະນັກງານ ທີ່ຈະຕ້ອງໄດ້ສູ້ຊົນ ຈັດຕັ້ງປະຕິບັດໃຫ້ສໍາເລັດ ຕາມເປົ້າໝາຍທີ່ໄດ້ວາງໄວ້ ໃນປີຕໍ່ໆໄປ.
Powered by Froala Editor