ກອງປະຊຸມສະຫຼຸບວຽກງານປະຕິຮູບລັດວິສາຫະກິດ ປະຈຳປີ 2025 ແລະ ທິດທາງແຜນການປີ 2026

ວັນທີ: 17 ທັນວາ 2025
ຜູ້ກ່າວເປີດ: ທ່ານ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ແລະ ຫົວໜ້າຄະນະປະຕິຮູບລັດວິສາຫະກິດ

1. ພາບລວມ ແລະ ຄວາມສຳຄັນຂອງກອງປະຊຸມ

ທ່ານ ສະເຫຼີມໄຊ ກົມມະສິດ ກ່າວວ່າ ຮູ້ສຶກເປັນກຽດທີ່ໄດ້ເຂົ້າຮ່ວມກອງປະຊຸມສະຫຼຸບວຽກງານປະຕິຮູບລັດວິສາຫະກິດ ປະຈຳປີ 2025 ແລະ ກຳນົດທິດທາງແຜນການປີ 2026. ກອງປະຊຸມຈັດຂຶ້ນໃນຊ່ວງທີ່ທົ່ວພັກ, ທົ່ວລັດ, ທົ່ວກອງທັບ ແລະ ປວງຊົນລາວ ພວມສຸມໃສ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ສະຫຼອງວັນຊາດຄົບຮອບ 50 ປີ, ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 105 ປີ, ພ້ອມທັງຊົມເຊີຍຜົນສຳເລັດກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ IX ແລະ ສືບຕໍ່ຜັນຂະຫຍາຍມະຕິສ້າງເສດຖະກິດເອກະລາດເປັນເຈົ້າຕົນເອງ ກໍ່ຄືວາລະແຫ່ງຊາດດ້ານການແກ້ໄຂຄວາມຫຍຸ້ງຍາກເສດຖະກິດ-ການເງິນ.

2. ຄວາມສຳຄັນຂອງວຽກງານປະຕິຮູບລັດວິສາຫະກິດ

ວຽກງານປະຕິຮູບ ແລະ ພັດທະນາລັດວິສາຫະກິດ ແມ່ນວຽກງານຍຸດທະສາດສຳຄັນຂອງພັກ ແລະ ລັດຖະບານ ໂດຍສະເພາະການຜັນຂະຫຍາຍມະຕິ 04 ຂອງກົມການເມືອງສູນກາງພັກ ແລະ ວາລະແຫ່ງຊາດດ້ານເສດຖະກິດ-ການເງິນ.

3. ບັນຫາ ແລະ ຈຸດມຸ່ງໝາຍຂອງການປະຕິຮູບ

ພາຍຫຼັງສູນກາງພັກອອກມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ແລະ ວາງທິດຊີ້ນຳເລັ່ງລັດການປະຕິຮູບ ເພື່ອໃຫ້ລັດວິສາຫະກິດເຂັ້ມແຂງ ແລະ ສາມາດແຂ່ງຂັນໄດ້. ທ່ານກ່າວວ່າ ຜ່ານມາລັດວິສາຫະກິດສ່ວນໃຫຍ່ດຳເນີນທຸລະກິດບໍ່ມີປະສິດທິຜົນ ແລະ ບໍ່ສາມາດເປັນເຈົ້າຕົນເອງໄດ້. ດັ່ງນັ້ນ ຈຶ່ງຕ້ອງເລັ່ງແກ້ໄຂ ເພື່ອໃຫ້ລັດວິສາຫະກິດ:

• ມີຄວາມເຂັ້ມແຂງ ແລະ ມີປະສິດທິຜົນ.

• ສາມາດແຂ່ງຂັນ ແລະ ເປັນເຈົ້າພາທາງໃນລະບົບເສດຖະກິດແຫ່ງຊາດ.

• ປະກອບສ່ວນໃຫ້ງົບປະມານແຫ່ງລັດ ແລະ ການພັດທະນາເສດຖະກິດ-ສັງຄົມ.

• ສາມາດບໍລິການສັງຄົມໃນວຽກງານຈຳເປັນ ທີ່ຫົວໜ່ວຍທຸລະກິດອື່ນບໍ່ດຳເນີນການ.

4. ຈຸດປະສົງ ແລະ ວາລະກອງປະຊຸມ

ກອງປະຊຸມຄັ້ງນີ້ເປັນກອງປະຊຸມຄັ້ງທຳອິດຂອງວຽກງານປະຕິຮູບລັດວິສາຫະກິດ ໂດຍມີຈຸດປະສົງເພື່ອ:

• ຕີລາຄາຜົນການຈັດຕັ້ງປະຕິບັດວຽກງານປີ 2025.

• ກຳນົດທິດທາງແຜນການປີ 2026.

• ຮັບຟັງຄຳໂອ້ລົມຂອງ ທ່ານ ທອງລຸນ ສີສຸລິດ, ເລຂາທິການໃຫຍ່ ແລະ ປະທານປະເທດ.

• ໃຫ້ຜູ້ເຂົ້າຮ່ວມກຳແໜ້ນທັດສະນະ ແລະ ທິດຊີ້ນຳຂັ້ນເທິງ ເພື່ອນຳໄປຜັນຂະຫຍາຍ.

• ຮັບຟັງບົດຮຽນການປະຕິບັດແຜນປະຕິຮູບ ແລະ ແຜນທຸລະກິດຈາກບາງລັດວິສາຫະກິດ.

5. ຂໍ້ຮຽກຮ້ອງຕໍ່ຜູ້ເຂົ້າຮ່ວມ

ທ່ານໄດ້ຮຽກຮ້ອງໃຫ້ຜູ້ເຂົ້າຮ່ວມສຸມສະຕິປັນຍາໃນການປຶກສາຫາລື ແລກປ່ຽນຄຳຄິດເຫັນ, ຕີລາຄາວຽກງານປີ 2025 ຢ່າງພາວະວິໄສ, ວິເຄາະແຕ່ລະບັນຫາໃຫ້ຈະແຈ້ງ ແລະ ກຳນົດມາດຕະການແກ້ໄຂຢ່າງສອດຄ່ອງ ແລະ ມີຫຼັກການ. ພ້ອມກັນນັ້ນ ກຳນົດແຜນການປີ 2026 ໃຫ້ສອດຄ່ອງກັບສະພາບເງື່ອນໄຂ ແລະ ທ່າແຮງຕົວຈິງຂອງປະເທດ ລວມທັງທ່າອ່ຽງຂອງສາກົນ ແລະ ພາກພື້ນ.

6. ການກ່າວເປີດກອງປະຊຸມ

ໃນຕອນທ້າຍ ທ່ານ ສະເຫຼີມໄຊ ກົມມະສິດ ໃນນາມປະທານກອງປະຊຸມ ໄດ້ກ່າວເປີດກອງປະຊຸມສະຫຼຸບວຽກງານປະຕິຮູບລັດວິສາຫະກິດທົ່ວປະເທດ ປະຈຳປີ 2025 ຢ່າງເປັນທາງການ.

Powered by Froala Editor